روعة السعدي تكشف سبب انسحابها من "حارة القبة 3"

بوسطة متابعة

كشفت الفنانة روعة السعدي سبب انسحابها من الجزء الثالث لمسلسل "حارة القبة"، وعدم متابعتها لشخصية "جميلة" التي أدتها في الجزء الأول والثاني من العمل.

وأضافت في لقاء لها ضمن برنامج "ET  بالعربي": "الحقيقة صار في خلاف مو خلاف فظيع إنو تخانقنا، بس كان في شي كنت موعودة فيه وعلى أساسو اشتغلت الجزء الأول والتاني" وأكملت "انوعدت بالجزء التالت بشي على صعيد النص كدور، وعلى الصعيد المادي وما تنفذ الاتفاق، فاعتذرت، ومتلي متلكن شفت الخبر على السوشال ميديا إنو راح لفنانة تانية، تسنيم باشا".

وأوضحت السعدي أن الخلاف ليس بينها وبين المخرجة رشا شربتجي "ما في أي مشكلة منشان ما الناس تفكر في خلاف وما ضايقتني بشي، والخلاف كان مع المنتج".

وعن سؤال "هل جرت أي مفاوضات بينها وبين صناع العمل حتى تعود"، أجابت: "هلأ أنا حكيتن آخر تلفون وكان يفترض إنن يرجعوا ويردولي خبر، فما كان في اتصال منن إن كانوا موافقين أو رافضين".

ورجحت روعة أن السبب بعدم معاودة الاتصال بها، كون الشخصية بالنسبة لصناع العمل ليست ذات أهمية كبيرة "ودور صغير كتير فما بتفرق معن"، مردفة: "وكان من المفترض يكون إلها بالجزء التالت دور أكبر، وكان لازم تتوسع بس ما تنفذ الشي يلي اتفقنا علي وأنا لأن ما اتنفذ اعتذرت، والوعد وقت توعدني إياه بدك توفي في".

وعن مشاعرها بعد إسناد الشخصية لفنانة أخرى قالت: "هلأ أنا زعلت، أني كنت حابة كون موجودة ضمن هذا المشروع، بس كمان بشوف إنو الدنيا قسمة ونصيب وكل حدا إلو رزقتو، وإذا هني اختاروا ما كون موجودة بالجزء التالت فهذا خيارن، وإذا ملاقين إنو في خيار تاني يمكن أحسن، بترجعلن، وأنا بالنسبة إلي ما باخذ شخصية حدا أخذها".

وعند سؤالها حول الأخبار التي انتشرت عن بدء التحضيرات للجزء الثالث من مسلسل "سوق الحرير"، قالت: "هلأ يلي اسمعتو ما في، حسب إذا بيتغير شي أو بيرجعوا بيعملوا، ما عندي فكرة بصراحة".

وتحدثت عن الشخصية التي لعبتها في الجزء الثاني من مسلسل "مقابلة مع السيد آدم" للمخرج فادي سليم والذي لم يعرض بعد، وقالت: "شخصية جديدة، محامية، في إلها خط لحالها، وفي توابع إلها بالعمل، فكانت فرصة بالنسبة إلي إني اطلع بعمل الناس حبتوا"، وتابعت: "ما فيي إحكي كتير عنها لأن رح تكون مؤثرة بالعمل".

وروعة التي عادت هذا العام لمهنة التمثيل بعد اتخاذها قراراً بالاعتزال سابقاً، تميل إلى الإقلال بإجراء لقاءات إعلامية، والسبب وفق ما قالت: "بصراحة عندي شوية خجل، لهيك عم إتوتر باللقاءات، وتاني سبب ما بحب دائماً ظلني عم إظهر إعلامياً" مضيفة: "بس عن جديد عملت وكان مع أشخاص معينة، وكان لازم وكنت عم اشتغل، أساساً وقت كون ما عم اشتغل ما بحب أعمل لقاءات".