تولين البكري للمرأة: لا تعوّدي الناس على التضحية

بوسطة - متابعة

تحدثت الفنانة تولين البكري عن قوة المرأة وحقيقة قدرة تحملها لمسؤوليات الحياة، قائلة إنه من الضروري لكل امرأة ألا تضحي بكل ما لديها.

وقالت عبر حسابها الشخصي على فيسبوك: "مرة وحدة حكتلي، ما تستقوي حالك، يعني ما تعملي حالك جدعة وقادرة على كلشي، أنا بعرف إنك قوية وعندك مسؤولية وبنت قد حالها، بس اللي حواليكِ لما بشوفوكِ هيك بيتعودوا وبيعتبروا عطفك وتفهمك وتحملك وقدرتك ومساعدتك صار حق مكتسب وبالآخر رح تضطري تشيلي كلشي لحالك، واللي بتقدميه من باب التطوع والعطاء رح يتحول لواجب ملزم فيكي ويحاسبوكِ إذا قصرتي فيه".

وتابعت: "بالحقيقة كنت بفكر إنو القوة والجدعنة وقدرة التحمل بتتقدر أكثر من الضعف والاتكال، بس للأسف الحقيقة كانت مختلفة، لما الناس تشوفك قادرة تحملي العبء كلو لحالك وقادرة تحلي أي مشكلة وتتأقلمي مع أي ظرف وقادرة تشيلي فوق كتافك من الإبرة للصاروخ، وبتعرفي تستندي وتطبطبي وتعدي وتتعودي وتجي على حالك - رح يقولوا معلش ما هي بتحمل، معلش ما هي مو بحاجتنا، معلش هيي بتقدر، معلش مرت بأصعب من هيك، معلش بتعرف تدبر حالا، معلش في شغلات أهم منا، معلش أزمة وبتعدي".

وأردفت: "بس الشي المهم الي راح عن بال الكل إنو في للقوة رصيد وهالرصيد إذا تم إستهلاكه زيادة عن اللزوم ممكن ينفد، وإذا نفد بدون إعادة شحن، رح تضطري توقفي مكانك وترفعي الراية البيضا، وهون الكارثة".

واختتمت تولين حديثها بالقول: "مشان هيك ما تستقوي بحالك، خلي جانب فيكي دايماً بحاجة لحدا يسندو، ما تعوديهم إنك الجبل الي ما بهزو ريح، ما تعوديهم عالتضحية، ولا على قدرة التحمل اللامنتهية، لأنك مخلوقة وعندك طاقة وقدرة تحمل ومشاعر وأحاسيس وحياة واهتمامات ورغبات وهوايات".